വധുവിനെ ആവശ്യമുണ്ട്

കുപ്പം: വിവാഹപ്രായമെത്തി നില്‍ക്കുന്ന ആണ്‍കുട്ടികളുടെ എണ്ണം കുപ്പം പ്രദേശത്തു വര്‍ധിച്ചു വരികയാണ്. ഇരുപത്തഞ്ചിനും മുപ്പത്തഞ്ചിനും ഇടയില്‍ പ്രായമുള്ള മുപ്പതോളം ചെറുപ്പക്കാരാണ് ഇപ്പോള്‍ ഇവിടെ ഉള്ളത്. മുന്‍കാലങ്ങളില്‍ വരനെത്തേടി പൊന്നും പണവുമായി പെണ്‍കുട്ടികളുടെ രക്ഷിതാക്കള്‍ നെട്ടോട്ടമോടുന്ന കാഴ്ചയായിരുന്നു. എന്നാലിന്ന് ആണ്‍കുട്ടികളുടെ മാതാപിതാക്കളാണ് ആ തലവേദന സഹിക്കുന്നത്. പുര നിറഞ്ഞു നില്‍ക്കുന്ന ഇത്തരം ചെറുപ്പക്കാരെ കെട്ടിക്കാന്‍ രക്ഷിതാക്കളും നാട്ടിലെ പ്രമാണികളും പെടാപ്പാട് പെടുകയാണ്.

ഇവര്‍ എങ്ങനെയെങ്കിലും പെണ്ണിനെ തേടിപ്പിടിച്ചു കൊടുക്കുമ്പോള്‍ ചെക്കന്നിഷ്ടമാകുന്നില്ല. പക്ഷെ അവനു ഇഷ്ടമായാലോ പെണ്ണിന് ഇഷ്ടമാവേണ്ടേ? എന്നാല്‍ രണ്ടു പേര്‍ക്കും ഇഷ്ടമായാലോ നാട്ടുകാര്‍ക്കിഷ്ടപ്പെടെണ്ടേ?പാരകള്‍ പല വിധമാണ് അപ്പോള്‍ പോകുന്നത്. ഇതാണ് തന്റെ കാര്യത്തില്‍ വിവാഹം ഇപ്പോഴും നീണ്ടു പോകാന്‍ കാരണമായി വിവാഹപ്രായം അതിര് കവിഞ്ഞു നില്‍ക്കുന്ന സി.എച്ച്. നഗര്‍ സ്വദേശിയായ യുവാവ്‌ കുപ്പം.ഇന്‍ നോട്‌ വെളിപ്പെടുത്തുന്നത്.

എന്നാല്‍ എസ്.എസ്.എല്‍.സി. പരീക്ഷയില്‍ റാങ്ക് സമ്പ്രദായം മാറി ഗ്രേഡിംഗ് സിസ്റ്റം വന്നതാണ് ഈയൊരവസ്ഥ വരാന്‍ കാരണമെന്ന് അവിവാഹിതനായ ഒരു യുവാവ് ചൂണ്ടിക്കാണിക്കുന്നു. ഗ്രേഡിംഗ് സമ്പ്രദായത്തില്‍ പെണ്‍കുട്ടികള്‍ ആരും തന്നെ പരാജയപ്പെടുന്നില്ല. എത്ര താഴ്ന്ന ഗ്രേഡ് കിട്ടിയാലും തോറ്റില്ലല്ലോ എന്ന് വീമ്പിളക്കി ഉന്നതവിദ്ധ്യാഭ്യാസത്തിനായി ഇറങ്ങിത്തിരിക്കുന്നു. അത് കൊണ്ട് തന്നെ പത്തില്‍ തോറ്റ പെണ്‍കുട്ടികളെ മുന്‍കാലങ്ങളെ അപേക്ഷിച്ച് ഇപ്പോള്‍ നാട്ടിലും മറുനാട്ടിലും കാണ്മാനെയില്ല. ഈ അഭിപ്രായത്തെ വളരെക്കാലം വിവാഹവിപണിയില്‍ വില്പ്പന്ച്ചരക്കായിരുന്ന മറ്റൊരു സഹോദരന്‍ പിന്താങ്ങുന്നു.

മുന്‍പ് ഗള്‍ഫില്‍ പോയി രണ്ടു മാസത്തേക്ക് ലീവിന് വന്നാല്‍ വിവിധങ്ങളായ ഓഫെര്‍ നല്‍കിക്കൊണ്ട് രക്ഷിതാക്കളും ബ്രോക്കര്‍മാരും വീട്ടില്‍ നിരന്തരം കയറിയിറങ്ങുമായിരുന്നു. എന്നാലിപ്പോള്‍ ആറ് മാസം ലീവെടുത്ത് നാട്ടില്‍ വന്നു പെണ്ണിനെ പരതിപ്പോയിട്ടു ചായയും പലഹാരങ്ങളും കഴിച്ചു വന്ന തടിയല്ലാതെ മറ്റൊന്നും ശരിയായില്ലെന്ന് പത്തോളം പെണ്ണുകാണല്‍ ചടങ്ങിന്റെ അനുഭവപത്രം ബാക്കിയായുള്ള ഇപ്പോഴും അവിവാഹിതനായ കുപ്പം സ്വദേശി സാകഷ്യപ്പെടുത്തുന്നു. മണലാരണ്യത്തില്‍ നിന്നും കല്യാണം കഴിക്കാനായി വന്നു പെണ്ണന്വേഷിച്ചു തളര്‍ന്നു വാടിയ മുഖവുമായി ഇനി ഈ പരിപാടിക്ക് ഞാനില്ലെന്നു പറഞ്ഞു തിരിച്ചു പോയ മറ്റൊരുത്തനും അനുഭവം തഥൈവ.

പെണ്ണിനെ കിട്ടാതായപ്പോള്‍ ഗള്‍ഫിലേക്ക് രക്ഷിതാക്കള്‍ നിര്‍ബന്ധിച്ച്ചു പറഞ്ഞയച്ച യുവാവിന്റെ കാര്യം നോക്കിയാല്‍ മാത്രം ഈ പ്രദേശത്തെ യുവാക്കള്‍ എത്ര മാത്രം കഷ്ടപ്പെടുന്നുന്ടെന്നു മനസ്സിലാക്കാം. ഇവരുടെ പിന്നിലുള്ള അനുജന്മാര്‍ അവസരത്തിനായി ക്യു കെട്ടി കാത്തു നില്‍ക്കുന്നത് കാണുമ്പോള്‍ ഈ ചെറുപ്പക്കാരുടെ നെഞ്ചിടിപ്പ് കൂടുകയാണ്.

ഇതിന്നിടയില്‍ ബ്രോക്കെര്മാരും ധര്മസങ്കടത്തിലാണ്. തങ്ങളുടെ പ്രധാന പ്രവര്‍ത്തനമെഖലകളിലൊന്നായ കുപ്പതു തന്നെ ഈ ഗതി വന്നത് തങ്ങള്‍ക്കും ക്ഷീണമാണെന്ന് സ്ഥലത്തെ പ്രധാന ബ്രോക്കെര്മാരും വെളിപ്പെടുത്തുന്നു. സ്വന്തം അളിയന് പോലും പെണ്ണിനെ നല്‍കാന്‍ സാധിക്കാഞ്ഞത് തന്നെ സ്ഥിതി വളരെയധികം മോശമായത് കൊണ്ടാണെന്ന് പ്രദേശത്തെ ഒരു പ്രമുഖബ്രോക്കര്‍ വെളിപ്പെടുത്തുന്നു. സ്ഥലത്തെ പ്രധാനികളായ പല പ്രമാണികളും ഇവരെ എവിടെയെങ്കിലും ഒന്ന് കൂട്ടിക്കെട്ടുവാന്‍ പരിശ്രമിക്കുന്നുണ്ട് .

കുപ്പം, സി.എച്ച്. നഗര്‍, മുക്കുന്നു, എരിഞ്ഞിയില്‍ തുടങ്ങിയ പ്രദേശത്തുള്ള ചെറുപ്പക്കാരാണ് ഇവരില്‍ മിക്കയാളുകളും. ഇവരുടെ കൂട്ടുകാരില്‍ പലരും പിതാക്കന്മാരായപ്പോള്‍ തങ്ങളുടെ ദുഃഖം ആരോട് പറയണമെന്ന വിഷമത്തിലാണ് ഇവര്‍. ബസ്‌ സ്റ്റോപ്പ്‌, കപ്പാലം, ബസ്‌ സ്ടാന്ട്, കോളേജ്-സ്കൂള്‍ പരിസരങ്ങള്‍ തുടങ്ങിയ സ്ഥലങ്ങളില്‍ തങ്ങളുടെ ജീവിതം തീരുമോ എന്ന ആശങ്കയില്‍ ഈ യുവത അവരുടെ നല്ല പ്രായം തള്ളി നീക്കുകയാണ്.എത്ര നോക്കിയിട്ടും ശരിയാവാതെ!